नारायणी नदी पसेपछि सुस्ताका आधाभन्दा बढी घर डुबानमा

नवलपरासी । पश्चिम नवलपरासीको सुस्ता गाउँपालिका ५ सुस्तामा आधाभन्दा बढी घर डुबानमा परेको छ । नारायणी नदीमा आएको बाढी सुस्ता पसेपछि सुस्तामा डुबान गराएको सुस्ता बचाउ अभियानका प्रवक्ता रविन्द्र जैसवालले बताउनु भएको छ ।

लगातार परेको अविरल वर्षाले शुक्रवार दिउसो देखि नै सुस्तामा बाढी पस्न सुरु भएको प्रवक्ता जैसवाले भन्नुभएको छ । उहाँका अनुसार सुस्तामा २ सय २० घरधुरी रहेको छ । जस्मा केही घर बाहेक लगभाग सबै घरमा बाढी पसेको छ । सुस्ताको थारु टोलमा सबै भन्दा पहिला बाढी पसेको उहाँले भन्नुभयो ।

सुस्तामा पानी पस्न सुरु भएलगतै विपद् उदरका लागि ठुलो संख्यामा सुरक्षाकर्मी परिचालन गरिएको जिल्ला प्रशासन कार्यालय नवलपरासीका प्रमुख जिल्ला अधिकारी दिपक राज नेपालले बताउनु भएको छ । बाढी पसेको घरपरिवारलाई सुस्ता मै रहेको आश्रय स्थलमा राखिएको उहाँले भन्नुभयो । नारायणी नदीमा पानीको सतह निरन्तर बढने क्रम जारिरहेकोले सुस्तामा रहेका महिला, बालबालिका, बृद्ध तथा असहायहरु लाई नारायणी नदी वारी सुस्ता ५ मै रहेको वीपि मा.वि.बलिनगरमा ल्याउने तयारी भइरहेको उहाँले बताउनु भएको छ । जसका लागि नेपाल प्रहरी, सशस्त्र प्रहरी र नेपाली सेना परिचालन गरिएको उहाँले भन्नुभयो । 

अहिलेसम्म बाढीबाट डुबानमा परेको २९ जनालाई सशस्त्र प्रहरी बलले उद्धार गरि सुरक्षित स्थानमा पठाएको सशस्त्र प्रहरी बल नेपाल नम्बर २६ गणका प्रमुख (एसपी) गोविन्द बहादुर खातीले बताउनु भएको छ । 
बाढी पसेपछि पक्की घरबाहेक कच्ची घर (खरपात तथा माटोले बनेको घर) मा क्षति धेरै भएको सुस्ताका स्थानीय मुन्सी कुमार हरिजनले बताउनु भएको छ । सुस्तामा अधिकांश घर कच्ची नै रहेको छ । ती घर परिवारले केही समानलाई लिएर आश्रय स्थल तर्फ गएका छन् भने केही बाढीले क्षति भएको छ ।

नारायणी नदीमा यो वर्षकै सबै भन्दा ठुलो पानी आएको मापन गरिएको छ । गण्डक वराज बाल्मीकिनगरका अनुसार नारायणी नदीमा अहिले २ लाख ८० हजार क्यूसेक पानी पुगेको छ ।