बाढी पसेपछि सुस्ताका ७८ घरपरिवार सुरक्षित स्थानमा सारिए

नवलपरासी । निरन्तरको वर्षाले पश्चिम नवलपरासीको सुस्तामा पानी पस्न थालेपछि त्यहाँका स्थानीयहरु अस्थायी रुपमा सुरक्षित स्थान तर्फ सरेका छन् । 

जिल्लाको सुस्ता गाउँपालिका ५ सुस्ता स्थित थारु टोलका घरपरिवार सुस्तामै रहेको सामुदायिक भवन तथा आफ्न्तीकोमा आश्रय लिएको जिल्ला प्रशासन कार्यालय नवलपरासीका प्रमुख जिल्ला अधिकारी दिपक राज नेपालले बताउनु भएको छ । उहाँले भन्नुभयो, “सुस्ताको थारु टोलमा केहि घरमा थोरै पानी पसेपछि त्यहाँका स्थानीयहरु लाई सुरक्षित स्थानमा गएर बस्न आग्रह गरिएको हो । केही आफ्न्तीमा गएर बसेका छन । भने केहि सुस्तामा रहेको सुरक्षित आश्रय स्थल (सामुदायिक भवन) मा बसेका छन् ।”

सुस्ता बचाउ अभियानका प्रवक्ता रविन्द्र जैसवालका अनुसार थारु टोलमा रहेको ७८ घरपरिवारलाई सुस्ताको आश्रय स्थल र आफ्न्तीमा सारिएको छ । नारायणी नदीको बाढी थारु टोलमा प्रवेश गरेपछि नेपाल प्रहरी लगायत उद्धार कार्यका लागि खटिएका सुरक्षाकर्मीहरु सहयोगमा सूचना प्रवाह गर्दै स्थानीयहरु लाई सुरक्षित स्थानमा सारिएको हो । 

सुस्ता कै स्थानीय मुन्सी कुमार हरिजनका अनुसार लगातारको वर्षाले सुस्ताको थारु टोलमा रहेको त्तीस घर डुबानमा परेको छ । नारायणी नदीको बाढी सिधै सुस्ताको थारु टोलमा प्रवेश गरी घर, खेतबारी तथा बाटोहरु डुबान गराएको बताउनु भएको छ । 
उहाँले भन्नुभयो, “मैलै लगाएको १० कठ्ठामा उँखु खेती पनि नारायणीको बाढीले बटान गरि बगाएको छ । म जस्तै दर्जनौ भन्दा बढी किसानको धान र उँखु लगायतको बाली कटान गरि बगाएको छ ।”

सुस्ता स्थित नारायणी नदीले वर्षा मौसम सुरु भए लगतै अस्थायी बाँध कटान गर्दै सुस्ताको धेरै भूमि कटान गरिसकेको छ ।