नारायणी नदीको कटान सुस्ताको बस्ती नजिक पुग्यो

नवलपरासी । पश्चिम नवलपरासीको सुस्ता गाउँपालिका–५ सुस्तामा नारायणी नदीको निरन्तर कटान सुस्ताको थारु बस्ती नजिक पुगेको छ ।

सुस्ताका स्थानीय मुन्सी कुमार हरिजनका अनुसार नारायणी नदीको निरन्तर कटानले थारु बस्ती पुग्न ५० मिटर मात्रै बाँकी रहेको छ । उहाँले भन्नुभयो, “सुस्तामा अस्थायी बाँध निर्माणको कार्य निरन्तर भएपनि नारायाणी नदीको कटान बस्ती नजिक पुगेको छ । मैले लगाएको १० कठ्ठाको उँखु बाली ८ कठ्ठा नारायणी नदीले कटान गरेर नदीमा मिसाइ सकेको छ र्। म’ सहित दर्जनभन्दा बढी किसानकोे धान, उँखु र केरा बाली लगायत करिब १५ विगहा क्षेत्रफल नारायणीले कटान गरिसकेको छ ।”
अब पनि कटान रोकिएन भने अबको केहि दिनमा नारायणीले सुस्ताको थारु टोल नै कटान गर्ने स्थानीय हरिजनले बताउनु भयो । थारु टोलका केही स्थानीयहरु सुस्तामा रहेको सामुदायिक भवनको सहारा लिएर बस्दै आएका छन् ।

नारायणीले सिमा मानिएको सिमल(रुख) बगायो

त्यस्तै नेपाल–भारतबीच सुस्तामा सिमा स्तम्भको रुपमा सिमा मानिएको सिमलको रुखलाई पनि नारायणी नदीको भेलले बगाएको छ ।

नारायणी नदीको निरन्तर कटानले नेपाल–भारत दुइ देशबीच सिमाको चिन्ह मानिएको सिमल अब नरहेको सुस्ता बचाउ अभियानका प्रवक्ता एवं स्थानीय रविन्द्र जैसवालले बताउनु भएको छ । उहाँले भन्नुभयो, नेपालको सुस्ता र भारतको विहार राज्य विचको सिमानाकामा जंगे पिलर (सिमा स्तम्भ) नभएपछि त्यहाँ रहेको ठुलो सिमलको रुखलाई सिमाको चिन्ह मानिएको थियो । तर उक्त सिमललाई पनि नारायणीको भेलले बगाएको छ ।

सिमललाई लामो समयदेखि सुस्तामा पिलर मानिएको थियो । त्यहाँ कुनै पनि सिमा स्तम्भ (पिलर) नभएपछि सिमल नै सिमा बनेको थियो । तर नारायणीको लगातारको कटानले सिमा नै बगाएको प्रवक्ता जैसवालले बताउनु भयो । सिमा त बगायो तर सुस्ता भूमि जोगाउन हामि निरन्तर प्रयासमा रहेको उहाँले भन्नुभयो ।

सुस्तालाई जोगाउनका लागि सिँचाइ तथा जलस्रोत व्यवस्थापन आयोजना भरतपुर चितवनले गत वर्ष साढे ११ करोडमा १ किलोमिटर तटबन्ध (बाँध) निर्माण गरेको आयोजनाका इन्जिनियर बेलबहादुर विश्वकर्माले बताउनु भएको छ । सोही ठाउँलाई जोडेर यो वर्ष पनि १ करोड ४६ लाखको लागतमा १३२ मिटर तटबन्ध निर्माणको काम सुरु गर्ने योजना थियो । तर त्यहाँ सिमा समस्याले काम रोकिएर अहिले पुरै कटान भइरहेको उहाँले बताउनु भएको छ ।

उहाँले भन्नुभयो, “नारायणी नदीको भेलबाट बस्ती कटान रोक्न हामि सक्दो प्रयासमा छौं । अस्थायी बाँध निर्माणका कार्य दिनहु भइरहेको छ । म आँफु पनि कार्य स्थलमै खटेर काममा सहयोग गरिरहेको छु । तर अब कतिको सफल हुने हो भन्ने कुरा रहेको छ ।”
अस्थायी बाँध निर्माणका लागि तारजाली, बोरोमा बालु तथा माटो र प्रकोप पाइन( आरसीसी ढलान पिलर) को प्रयोग भइरहेको आयोजना इन्जिनियर विश्वकर्माले बताउनु भएको छ