पहिरोले पेट्रोलपम्प र पाँच मोटरसाइकल पुरिए

सुलीकोट । गोरखा जिल्लाकाे गाेरखा नगरपालिका–११ बाह्रकिलोस्थित गोरखाकाली फ्युल सेन्टर पेट्रोलपम्प माथि खसेकाे पहिराेले डिस्पेन्सर मेसिन र पार्किङमा राखिएका पाँच वटा मोटरसाइकल पुरिएकाे छ ।

बिहीबार (आज ) बिहान ७ बजे पेट्रोलपम्पकाे करिब ५० मिटर माथि भिरबाट खसेको पहिरोले पेट्रोलपम्पको संरचना तथा मोटरसाइकल पुरिएको जिल्ला प्रहरी कार्यालय गोरखाका प्रहरी नायब उपरीक्षक राजकुमार श्रेष्ठले बताउनुभयो ।

घटनाको जानकारी पाएलगत्तै प्रहरी टोली घटनास्थलमा पुगेर सुरक्षा व्यवस्थापन, उद्धार तथा पहिरो पन्छाउने काममा जुटेको उहाँले जानकारी दिनुभयो । “पेट्रोलपम्पको अवस्था बुझ्ने र पुरिएका मोटरसाइकल सुरक्षित रूपमा निकाल्ने प्रयास भइरहेको छ,” उहाँले भन्नुभयो ।

पहिरोबाट कुनै मानवीय तथा पशुचौपायाको क्षति नभएकाले ठुलो दुर्घटना टरेको प्रहरीले जनाएको छ । 

वर्षायामसँगै पहिरोको जोखिम बढ्दै गएकाले जोखिमयुक्त क्षेत्रमा उच्च सतर्कता अपनाउन जिल्ला प्रशासन कार्यालय गोरखाले आग्रह गरेको छ । (गाेरखापत्र)