बाढी नियन्त्रणका लागि नदी सरसफाइ र तटबन्ध

नवलपरासी । पश्चिम नवलपरासीको झरही नदीको सरसफाइ तथा तटबन्धको काम गरिएको छ । चुरे पहाडबाट आएको झरही नदी रामग्राम नगरपालिका, पाल्हीनन्दन र सरावल गाउँपालिका हुँदै भारत तर्फ गएको छ ।

उक्त नदीमा आएको बाढिले प्रत्येक वर्ष स्थानीयहरुको धान खेति डुबाउनु देखि बस्तीलाई समेत प्रभावित पार्ने गरेको छ । त्यसैले यो वर्ष ८२ लाखको लगानीमा झरही नदीको सरसफाइ तथा तटबन्धको काम गरिएको नेपाल गण्डक पश्चिम नहर सिँचाइ व्यवस्थापन कार्यालय सेमरिका प्रमुख तिलकराम बढुाथोकीले बताउनु भएको छ । उहाँले भन्नुभयो, नदीमा सिल्ट(भस्कट) भरिएर नदीको सतह माथि आउनुका साथै साँघुरो समेत भएको थियो । यो वर्ष पाल्हीनन्दन र सरावल गाउँपालिकाको बिचमा पर्ने झरही नदीको पुलको अगाडि र पछाडी गरि ६१० मिटर लामो सरसफाई गर्नुका साथै तटबन्ध तथा मर्मतको काम गरिएको हो । 

त्यसैगरी सरावल गाउँपालिकाले पनि सोहि नदीमा मिसिएको धनेवा खोलाको सरसफाइ र तटबन्धको काम गरेको सरावल गाउँपालिकाका अध्यक्ष सुखाडि प्रसाद चौधरीले बताउनु भएको छ । उहाँले भन्नुभयो, झरही नदी र धनेवा खोलाको बाढीले प्रत्यक्ष असर मधवलीया, रामपुर खडौना, भटौलीया, बर्गदवा, नवडिहवा र गणेशपुर लगायतको बस्तीमा पर्छ । त्यसैले यस वर्ष गाउँपालिकाले २० लाख खर्चेर खोलाको सरसफाइ र तटबन्धको काम गरेको हो । गतवर्ष धनेवा खोलामा चेकवाल सहितको दुइवटा सैफन बनाएको उहाँले जानकारी गराउनु भएको छ । जसले खोलाको सतह बढेपछि बन्द र घटेपछि चेकवाल उठाएर थुनिएको पानी निकाल्ने काम हुन्छ ।

यस्तै सदरमुकाम स्थित रामग्राम नगरपालिकाले पनि झरही नदीको सरसफाई र तटबन्धको काम गरेको छ । २०७८ सालमा झरहि नदीमा आएको बाढी परासी बजारमा पसेर डुबान गराएको थियो । नगरपालिकाले गतवर्ष र यो वर्ष पनि नदीको सरसफाइ र तटबन्धको काम गरको रामग्राम नगरपालिकाका नगरप्रमुख धनपत यादवले बताउनु भएको छ ।