आगलागी हुँदा प्रतापपुरमा १२ घर जलेर नष्ट

नवलपरासी, । पश्चिम नवलपरासीको प्रतापपुरमा आज दिउँसो आगलागी हुँदा १२ वटा घर जलेर पूर्ण रुपमा नष्ट भएका छन् । 

प्रतापपुर गाउँपालिका वडा ५ भैरमपुरमा आगोले १२ जनाको कच्चि घर जलेर नष्ट भएको छ । आगलागीमा कुनै मानवीय क्षति नभएपनि ३ वटा बाख्रा जलेर मरेका छन् भने एउटा बाख्रा घाइते भएकाे छ । 

आगलागीबाट घर सहित अन्नपात लत्ताकपडा गरि ५० लाख बराबरको  क्षति भएको प्रारम्भिक अनुमान गरिएको जिल्ला प्रहरी कार्यालयका सूचना अधिकारी डिएसपी बीर दत्त पन्तले जानकारी दिनुभयो । पन्तका अनुुसार स्थानीय गोविन्द चमारले बिहान घरमा सरसफाईबाट जम्मा भएको फोहोर जलाउन बालेको आगो राम्रोसँग ननिभाँउदा हावाले उडाएर आगलागी भएको हो ।

गरिब विपन्न बस्तीमा आगोले घरबास जलेर नष्ट भएपछि उनीहरुको बिचल्ली भएको छ । घटनामा गोविन्द चमार सहित रामसिंह कुर्मी, राम बहादुर कर्मी, नगिना हरिजन, भुटेल हरिजन, सन्तोष हरिजन, कासिलाल चमार, शिवशरण कुर्मी, सदिक मियाँ, किमन कुर्मी र अनेश कुर्मीको कच्चि घर जलेर नष्ट भएको हो भने उमेश कुर्मीको दुई कोठे पक्कि घरमा पनि आगोले क्षति पुर्याएको छ । 

प्रतापपुर गाउँपालिकाका लागी दातृ निकायबाट दमकल प्राप्त भएको महिनौँ हुदा समेत संञ्चालनमा आउन सकेको छैन् ।  प्रहरी र स्थानीयको सहयोगमा आगो नियन्त्रणमा लिएको डिएसपी पन्तले बताउनुभयो ।

यस्तै प्रतापपुर गाउँपालिकाले ६ हजार ५०० काे खद्दान सामाग्री र १५  हजार नगद गरि  प्रत्येक घरलाइ २१ हजार ५०० काे दरले राहत  दिएकाे प्रतापपुर गाउँपालिका अध्यक्ष उमेश चन्द्र यादवले जानकारी गराउनु भएकाे छ ।त्यस्तै संघिय सांसद विक्रम खनालले पिडित परिवारहरूकाे समस्या समाधानकाे लागि पहन गर्ने बताउनु भएकाे छ ।