दाङ, मंसिर १२ । लुम्बिनी प्रदेश सरकारको स्वास्थ्य मन्त्रालयमा नेपाल विद्युत प्राधिकरणाले लाइन काटेकाे छ । प्राधिकरणले मन्त्रालयमा जडान भएको विद्युत् लाइन काटेपछि मन्रालय विद्युत्विहीन भएको छ ।
स्वास्थ्य मन्त्रालयको नाममा बुटवलमा मिटर जडान भएको मिटरमा उठेकाे महशुल नतिरेपछि राप्ती उपत्यका देउखुरीमा रहेको मन्त्रालयको विद्युत् लाइन काटिएको नेपाल विद्युत् प्राधिकरण लमही शाखाले जनाएको छ । विद्युत महशुल उठेकाे रकम भुक्तानी नभएपछि लाइन काटिएकाे हाे । कार्यालय प्रमुख युवराज रावतले बुटवलमा मन्त्रालयको नाममा जडान भएको विद्युत्को बाँकी बक्यौता दुई लाख ७२ हजार दुई सय ६४ रुपैयाँ ४४ पैसा रहेको बताए ।
सो रकम भुक्तानी गर्ने विषयमा मन्त्रालयले चासो नदिएपछि बाध्य भएर राप्ती उपत्यका देउखुरीमा रहेको मन्त्रालयको विद्युत् लाइन काट्नु परेको कार्यालय प्रमुख रावतको भनाइ छ । मन्त्रालयमा मंसिर ५ गते नै विद्युत लाइन काटिएको हो ।
बिजुली जडान नहुँदा मन्त्रालयको कामकाज प्रभावित भएको छ । स्वास्थ्य मन्त्रालयका सचिव डाक्टर जनार्दन शर्माले बिना जानकारी बिजुली काटिएको जिकिर गरे । उनले पत्र पठाउना साथ विद्युत् काट्नु गलत भएको बताए । महसुल भुक्तानीका लागि प्रक्रिया थालिएको उनको भनाइ छ । शिलापत्र अनलाइन
