काठमान्डाैं, साउन २४ । स्वास्थ्य तथा जनसङ्ख्या मन्त्रालयले सबै सरकारी कार्यालयलाई ‘लामखुट्टे खोज र नष्ट गर’ अभियान सञ्चालन गर्न आग्रह गरेको छ । देशमा बढदै गएकाे डेंगु सङ्क्रमणलाइ नियन्त्रण गर्नका लागि मन्त्रालयले अभियान सञ्चालन गर्न भनेकाे छ ।
हरेक शुक्रबार सरकारी तथा गैरसरकारी कार्यालय र अस्पताल परिसरमा सरसफाइ गर्नाका साथै ‘लामखुट्टे खोज र नष्ट गर’ अभियान सञ्चालन गर्न आग्रह गरिएको मन्त्रालयका प्रवक्ता प्रकाश बुढाथोकीले जानकारी दिनुभएकाे छ । प्रवक्ता बुढाथोकीले सरकारी अस्पतालमा डेँगीका बिरामीको उपचार खर्च सरकारले व्यहोर्ने जानकारी दिनुभएकाे छ । मन्त्रालयले सरकारी अस्पताललाई डेँगी सङ्क्रमितको उपचार व्यवस्थापन मिलाउन आग्रह गर्दै अस्पतालमा परिसरमा ‘डेँगी डेस्क’ स्थापना गरी सम्पर्क व्यक्ति तोक्न समेत निर्देशन दिएको छ ।
प्रवक्ता बुढाथोकीले स्वास्थ्य क्षेत्रको एकल प्रयासले मात्र डेँगी सङ्क्रमण नियन्त्रण गर्न नसकिने भएकाले प्रदेश र स्थानीय तहका सबै निकायको सहयोग आवश्यक रहेको बताउनु भएकाे छ। स्वास्थ्य मन्त्रालयले गत वर्ष पनि डेँगीको सङ्क्रमण बढेपछि अभियान सञ्चालन गर्न निर्देशन दिएको थियो । मन्त्रालयले आ–आफ्ना कार्यालयमा डेँगी सङ्क्रमणबारे सतर्कता र सचेतना कार्यक्रम सञ्चालन गर्न पनि निर्देशन दिएको छ । यो वर्ष ७३ जिल्लाका दुई हजार तीन सय ६५ जनामा डेँगी सङ्क्रमण र एक जनाको मृत्यु भएको छ ।
