काठमान्डाैं, भदाैं ११ । राष्ट्रिय स्वतन्त्र पार्टीले डा. मुकुल ढकाललाई साधारण सदस्यसमेत नरहने गरी पार्टीबाट निष्कासन गरेको छ ।
मंगलबार बसेको केन्द्रीय समितिको बैठकले डा. ढकाललाई पार्टीको साधारण सदस्यसमेत नरहने गरी निष्कासन गर्ने निर्णय गरेको केन्द्रीय सदस्य विनिता कडायतले जानकारी दिइन् ।
अनुशासन आयोगको सिफारिसमा केन्द्रीय समिति बैठकले ढकाललाई पार्टीको साधारण सदस्यसमेत नरहने गरी निष्कासन गरेको हो । यसअघि ५ भदौमा बसेको केन्द्रीय समितिको बैठकले ढकाललाई तेस्रोपटक स्पष्टीकरण सोध्ने निर्णय गरेको थियो । स्पष्टीकरण चित्तबुझ्दो नभएको भन्दै पार्टीबाट निष्कासन गर्न सजिलो हुने गरी कार्यबाहक महामन्त्री कविन्द्र बुर्लाकोटीले ढकाललाई २४ घण्टे स्पष्टीकरण सोधेका थिए ।
३० साउनमा बसेको केन्द्रीय समिति बैठकले ढकाललाई साधारण सदस्यबाट किन नहटाउने भनी दोस्रो स्पष्टीकरण सोधेको थियो, जसमा २४ घण्टाभित्र जवाफ बुझाउन भनिएको थियो । त्यसअघि २५ असारमा बसेको केन्द्रीय समितिको बैठकले पार्टी हितविपरीत गतिविधि गरेको भन्दै ढकाललाई महामन्त्री, प्रवक्ता र केन्द्रीय सदस्यको जिम्मेवारीबाट हटाएको थियो ।
त्यसको भोलिपल्टै पत्रकार सम्मेलन गरेर ढकालले आफूलाई रवि लामिछानेको क्लबबाट निकालिएको प्रतिक्रिया दिएका थिए । शिलापत्र
