खजुरा, असोज १२ गते । गत असोज ४ गते बाल सुधारगृह बाँकेको डुडुवा गाउँपालिकामा रहेको जयेन्दु बाल सुधारगृहबाट भागेर फरार रहेका एक जना बाल बन्दी समातिएका छन् ।
उक्त दिन राती १० बजे बाल सुधारगृहमा बाल बन्दीका बिचमा आपसमा झडप हुँदा त्यहाँ बाट बालबन्दी भागेर फरार रहेका चार जनामध्ये एक जना बाल बन्दी दैलेखबाट समातिएका हुन् । बाँके प्रहरी प्रवक्ता डिएसपी नारायण डाँगीका अनुसार बाँकेबाट खटिएको प्रहरी टोली र दैलेख प्रहरीले महाबु गाउँपालिकाबाट उनलाई पक्राउ गरेको हो ।
बाल सुधारगृहबाट भागेका अन्य तीन जना अझै भेटिएका छैनन् । उनीहरूलाई खोज्न प्रहरीले टोली परिचालन गरिएको डिएसपी डाँगीले बताउनुभयो ।
२ सय ५४ जना बाल बन्दी रहेको सुधारगृहमा यसपालिको झडपमा एक जना बाल बन्दीको मृत्यु भएको थियो भने ११ जना घाइते भएका थिए । बाल सुधारगृहमा भएको झडपमा अगुवाइ गरेका ६४ जनालाई अलग राखिएको छ । उनीहरूलाई विभिन्न प्रहरी कार्यालयका एकाइहरूमा राखिएको जनाइएको छ । गोरखापत्र अनलाईन
