काठमान्डाैं, कात्तिक १० । त्रिकोणात्मक टी–२० आई सिरिजअन्तर्गत आज शुक्रबार नेपाल र यूएईबीच फाइनल खेल हुँदै छ । हङकङसमेत सहभागी सिरिजमा नेपाल र युएई फाइनलमा पुगेका थिए । नेपाल अपराजित रहँदै फाइनल पुगेको हो ।
नेपाल र यूएईबीचको फाइनल खेल कीर्तिपुरस्थित त्रिवि अन्तर्राष्ट्रिय क्रिकेट मैदानमा बिहान ११ बजे सुरु हुनेछ । डबल राउन्ड रोविनका आधारमा भएको सिरिजमा नेपालले यूएई र हङकङलाई दुई–दुई खेलमा पराजित गरेको थियो ।
यसअघि नेपालले पहिलो खेलमै यूएईलाई ७ विकेटले पराजित गरेको थियो भने यूएईलाई अर्को खेलमा ६ विकेटले हराएको थियो । त्यस्तै, हङकङलाई पहिलो खेलमा ६ विकेटले र दोस्रो खेलमा ७९ रनले हराएको थियो ।
आईसीसी टी–२० विश्वकप एसिया छनोटको तयारीस्वरुप आयोजना गरिएको यो सिरिजमा नेपालले उत्कृष्ट प्रदर्शन गरिरहेको छ ।
