पोखरा,कात्तिक १४ । संयुक्त राष्ट्रसंघका महासचिव एन्टोनियो गुटेरेसले जलवायु परिवर्तनका कारण हिमाली क्षेत्रमा धेरै असर परिरहेको बताएका छन् । यही कारण धेरै ठाउँमा हिमपहिरो गइरहेको उनको भनाइ छ ।
मंगलबार अन्नपूर्ण आधार शिविर पुगेर फर्किएपछि पोखरा विमानस्थलमा संक्षिप्त प्रतिक्रिया दिँदै गुटेरेशले भने, ‘जलवायु परिवर्तनले धेरै ठाउँमा हिमपहिरो गैरहेको छ ।’
जलवायु परिवर्तनले साना देशलाई धेरै असर पारेको उल्लेख गर्दै उनले यसबाट बच्न प्रभावकारी एकता आवश्यक रहेको औँल्याए । ‘जलवायु परिवर्तनले साना देशलाई प्रतिकूल असर पारेको छ । यो समस्याबाट बच्न प्रभावकारी एकता आवश्यक छ,’ उनले भने ।
प्रभावितहरूलाई अझै बढी आर्थिक सहयोग चाहिएको उल्लेख गर्दै उनले त्यसका लागि अन्य देशहरूसँग कुरा गर्ने बताए । ‘प्रभावितलाई अझै बढी आर्थिक कोष चाहिएको छ । त्यसका लागि म अरु देशसँग आफ्ना कुरा राख्ने छु,’ उनले भने । नेपालको औपचारिक भ्रमणका क्रममा सोमबार पोखरा पुगेका गुटेरेस मंगलबार बिहान नेपाली सेनाको हेलिकोप्टरमा अन्नपूर्ण आधार शिविर गएका थिए । shilapatra online
