काठमान्डौं, कात्तिक १९ । आईसीसी टी–२० विश्वकप छनोट एसिया क्षेत्रको फाइनल खेलमा नेपालले ओमानलाई १ सय ८५ रनकाे लक्ष्य दिएकाे छ । टस जितेर पहिले ब्याटिङ गरेकाे नेपालले निर्धारित २० ओभरमा ६ विकेट गुमाएर १ सय ८४ रन बनाएकाे हाे ।
नेपालका लागि कप्तान राेहितकुमार पाैडेल, गुल्शन झा र करण केसीले शानदार ब्याटिङ गरे । गुल्शनले २५ बलमा ५४ रनकाे शानदार अर्धशतकीय पारी खेले । सुरुवाती ब्याटरहरू सस्तैमा आउट भएका बेला मैदान छिरेका उनले कप्तान पाैडेलसँग महत्वपूर्ण साझेदारी गर्दै टिमलाई उकासेका हुन् ।
पाैडेल ३७ बलमा ५२ रनकाे अर्धशतकीय पारी खेलेर नटआउट रहे । करण केसी ६ बलमा २० रन बनाएर नटआउट रहे । कुशल भुर्तेलले २२ बलमा ३१, आसिफ सेखले ६ बलमा ६, सन्दीप जाेराले १३ मा १०, कुशल मल्लले ९ बलमा ३ र विवेक यादवले ३ बलमा १ रनकाे याेगदान दिए ।
ओमानका बिलाल खानले तीन तथा आकिब सुलेहरीले दुई विकेट लिए । जिशान मकसुदलले एक विकेट लिए ।
नेपाल यूएईलाई र ओमान बहराइनलाई हराउँदै फाइनलमा पुगेका हुन् । समूह ‘ए’मा रहेका दुवै टोलीबीच लिग चरणमा भएकाे भेटमा नेपाल ओमानसँग पाँच रनले हारेकाे थियाे ।
समूह उपविजेता बनेर अघि बढेकाे नेपालले सेमिफाइनलमा यूएईलाई आठ विकेटले हराएर फाइनल प्रवेश गरेको हाे । फाइनल प्रवेश गरेका नेपाल र ओमान आगामी वर्ष हुने टी-२० विश्वकपमा छनोट भइसकेका छन् । शिलापत्र
