बारा, कात्तिक २० । जनता समाजवादी पार्टीका अध्यक्ष उपेन्द्र यादवले संघीयता र समावेशी खारेज गर्न एउटा पक्ष लागिरहेको आरोप लगाएका छन् ।
दिपावली तथा छठ पर्वका अवसरमा बाराको तेलकुवा महादेव मन्दिरमा आयोजित शुभकामना आदानप्रदान कार्यक्रमलाई सम्बोधन गर्दै उनले संघीयता र समावेशी खारेज भए लोकतन्त्र खतरामा पर्ने बताए ।
‘संघीयता कार्यान्वयन गर्न पुलिस, कर्मचारी प्रशासन, आर्थिक स्रोत प्रदेशलाई हस्तान्तरण गरोस् । प्रदेशलाई अधिकार सम्पन्न गर्न कानुन बनाइयोस्,’ उनले भने । यादवले ५३ प्रतिशत जनसंख्या भएको मधेश प्रदेशलाई संघीय सरकारले जम्मा १२ प्रतिशतमात्रै बजेट विनियोजन गरेको भन्दै विकास हुन कति वर्ष लाग्ला भनेर सोच्नुपर्ने गम्भीर विषय उब्जेको बताए ।
‘हामीलाई अधिकार, सुशासन, प्रशासन आफ्नो चाहियो । संघीय सरकारले पठाएका प्रशासन हामीलाई चाहिँदैन, संघीयताको अर्थ केन्द्रमा साझेदारी, प्रदेशमा आफ्नो शासन, प्रशासन हो, तबमात्र अधिकार सुरक्षित हुन्छ,’ यादवले भने ।
उनले जथाभावी चुरे उत्खनन् गर्दा त्यसको प्रत्यक्ष असर मधेस प्रदेशमा परेको बताउँदै चुरे क्षेत्रमा दोहन गरेर मधेशलाई मरुभूमि बनाउने कुनै निर्णय भए मधेशका जनतालाई पाच्य नहुने बताए । शिलापत्र अनलाइन
