यु-१९ विश्वकप क्रिकेटको आफ्नो तेस्रो खेलमा नेपालले उत्कृष्ट सुरुवात गरेको छ । अफगानिस्तानविरुद्ध सुरुमा बलिङ गरेको नेपालले पहिलो ओभरमा विकेट लिएको छ । पहिलो ओभर बलिङ गरेका गुल्सन झाले चौथो बलमा विकेट लिएका हुन् । गुल्सनले अफगानिस्तानका ओपनर नुमन शाहलाई आउट गरे ।
त्यस्तै दोस्रो ओभर बलिङ गरेका आकाश चन्दले पनि आफ्नो तेस्रो बलमा विकेट लिएका छन् । चन्दले खालिद तानिवाललाई आउट गरेका हुन् ।
दक्षिण अफ्रिकाको इस्ट लण्डनमा अफगानिस्तानले टस जितेर ब्याटिङ रोजेपछि नेपालले सुरुमा बलिङको निम्तो पाएको हो । आजको खेलमा नेपालले दुई खेलाडी परिवर्तन गरेको छ । नेपालका दुर्गेश गुप्ता र उत्तम थापा मगरको स्थानमा तिलक भण्डारी र दीपक बोहरालाई टिममा समावेश गरिएको छ ।
सुपर-६ मा पुग्न नेपाल र अफगानिस्तान दुवैलाई जितको आवश्यक छ ।
